Dzidziso isina ruomba
By Chinofunga Ndoga
Manzuma yave pauriri
Heyo yozeya chisvusvuro chezuva
Mushure yorara dzemadzikiriri
Uku mwene nyunyuto kuzvuva
Dzake tsoka onanga kwaSadunhu
Kuno rara amire pachivanze chedzidziso
Ko mukweguru anoida yei?
Rwendo kusarudzo akakwenya zvichida kashanu
Jana nhasi kuparura rwechimurenga
Kushirikadzi dzisina chekupakura
Nhasi dzotsinhira nesimba rederere
Uku dova regukurahundi riri banga
Kutsoka dzizere man’a
Jana nhasi kuparura rwechimurenga
Kushirikadzi dzisina chekupakura
Nhasi dzotsinhira nesimba rederere
Uku dova regukurahundi riri banga
Kutsoka dzizere man’a
Hedzoka harahwa nechembere kudzana
Sesvikiro guru Nehanda
Pwere dzouchira moyo yati svii
Nehasha dzechikoro chine
Varairidzi vakaramwa basa
Gutsa ruzhinji yakaendepi?
Aziva donzvo remurairidzi mutsva ndiyani
Baba vemwana tirumei nzeve
Zvichida maziva kubva muzevezeve rechitirongo
Kuno pwere dzarura kupinda shumba
Mwaka uno kana gejo hatibayi
Igangaidzva mukwenyi
Burusasike chairo
Chinopona chine mudzimu wacho
Pamhirizhonga ine maungira
Emapopoma aZambezi
Ratinhira bhanan’ana rebopoto
Kubva mumutema rege wembada
Unoyeverwa neropa risakapara mhosva
Ratungidzwa rimi kudya mhuka dzesango
Nhaka nhomba yenyama ichatibaya
Pasina sanzu rekudzimura wadai
Kukwira gomo kuninga yaNhoworeka
Vari nyikadzimu
No comments:
Post a Comment